Саврасовлар - искекостейлылар өчен үрнәк

Бу гаилә - Костей авылында үрнәкле һәм хөрмәт ителүчеләрнең берсе. Ирле-хатынлы Дмитрий Иванович һәм Евдокия Яковлевна Саврасовлар күп балалы гаиләләрдә туып-үскәннәр, аларда игелекле һәм хезмәт сөючән балалар тәрбияләү әти-әниләр өчен төп максат була.

Дмитрий Иванович иртә ятим кала. 6нчы сыйныфны тәмамлый, механизацияләү училищесында тракторчы-комбайнчыга укый. Армиядән соң бәхетен читтән эзләми, туган колхозында кала һәм озак еллар механик булып эшли. Аз сүзле, тыйнак егет хезмәт сөючән, кыю һәм булдыклы чибәр кыз Евдокия Яковлевнаны тормыш юлдашы итеп сайлый. Кызны һәм аның җиде ир һәм кыз туганын әнисе ялгызы үстерә. Ул кечкенә яшьтән үзаллы булып, эш рәтен белеп үсә һәм беренче караштан ук егетнең күңеленә хуш килә. Менә 60 елга якын инде ир белән хатын бер-берсенә ярдәмләшеп, кулга-кул тотынышып тормыш буйлап атлыйлар.

Бөтен яшьлекләрен эшкә һәм балалар тәрбияләүгә багышлыйлар. Икесе дә дуңгызчылык фермасында эшлиләр. Евдокия Яковлевна колхозның иң яхшы дуңгыз караучыларының берсе була, район терлекчеләренең социалистик ярышларында иң яхшы нәтиҗәләргә ирешеп, күптапкырлар мактау грамоталары белән бүләкләнә. Эш авыр булуга – ел әйләнәсенә резин итекләрдә, югары дымлылыкта, үзенчәлекле истә эшләргә туры килүенә карамастан, ул эшләве күңелле булды һәм коллектив тату иде, ди. Колхоз рәисләре И.И.Исаев һәм Ф.Г.Хәкимов турында аеруча җылылык белән хәтергә ала: “Яхшы, гадел, үз эшләрен белүче һәм эшчәннәр турында хәстәрлек күрүче җитәкчеләр булдылар. Фәрит Гыймазетдинович, мәсәлән, кайвакыт Бакалыда очраса, туктамый калмый, исәнләшә, сөйләшә, эшләр турында белешә. 25 ел диярлек пенсиядә булып та безне онытмаулары күңелле”.

Саврасовлар ике баласын производстводан аерылмый тәрбияләп үстерделәр дип әйтергә мөмкин. Кызлары Людмила һәм уллары Владимир кече яшьтән хуҗалыкта алыштыргысыз ярдәмчеләр булдылар. Ә ветераннарның хуҗалыгы һәрвакыт зур булды, хәзер генә ул тавыклар гына калды. Ел әйләнәсенә балалары ихатада да, йортта да ярдәм иттеләр. Мал абзарын тазартырга, су ташырга, идән юарга, бакчада сезонлы эшләр эшләргә һәм печән хәзерләргә өлгерделәр.

Ветераннар уллары Влади-мирның үз гаиләсе белән Иске Костей авылында төпләнеп калуына шатланалар. Ул - кочегар, ә киленнәре Светлана мәктәп директоры булып эшлиләр. Алар өч бала тәрбиялиләр. Саврасовларның олы кызлары Людмила Октябрьский шәһәрендә яши, ул пенсиядә, кыз үстерде, хәзер ике оныгын тәрбияләргә ярдәмләшә. Балалар әти-әниләрен хөрмәт итәләр һәм яраталар.

– Әти-әниебез иң яхшылар, безне күп нәрсәгә өйрәттеләр, - диләр бертавыштан Владимир һәм Людмила. Шул ук вакытта әти-әни ягыннан һәрвакыт ышанычлы тыл булуын һәм даими ярдәм тоябыз.

Саврасовлар зур матур йортта яшиләр. Олы яшьтә булуларына карамастан, ветераннар авылдашларыннан калышырга теләмиләр – күптән түгел йортларының түбәсен яңарттылар, өйләрен сайдинг белән тышладылар, киләчәктә өйтүр бакчаның коймасын алмаштырырга ниятлиләр. Алар шатлыкларын һәм кайгыларын уртаклашып, гаилә тормышын башлаучы яшьләргә яхшы үрнәк булып, бер-берсе өчен җан атып бәхетле яшиләр.

Раил СӘЕТОВ, Иске Костей авыл Советы авыл биләмәсе башлыгы.