Республикага, театрга дан җырлыйбыз

Иҗади Театр елына башлангыч 2018 елның декабрендә салынды. Тантаналы стартка республиканың дәүләт театраль учреждениеләре кушылды, премьера постановкалары, мастер-класслар, иҗади кичәләр, театраль тамашалар һәм башка күп чаралар үтте. Районда шулай ук безнең Н.Асанбаев исемендәге халык татар театры гастрольләре булды. Кайбер авыл биләмәләрендә һәм Мәдәният сараенда Назар Нәҗми әсәре буенча “Гармунчы дус” спектакле күрсәтелде.

Театр елының Башкортстан оештырылуның истәлекле 100 еллык датасы белән туры килүе символикалы. Бу темалар үзара тыгыз үрелә һәм ел дәвамында аерым игътибар үзәгендә торачаклар. Шуңа күрә районның чираттагы фестивале “Башкортстан – язмышым минем” дип исемләнде. Шушы көннәрдә район Мәдәният сараенда беренче концерт-лекторий үтте.

Программа барышында Сергей Пигин һәм Светлана Сәетова сәхнәдән театрлар барлыкка килү тарихы белән таныштырдылар, республиканың театраль коллективлары һәм истәлекле дата кысаларында алда торган чаралар турында сөйләделәр. 1982 елда Виктор Маслов тарафыннан безнең Бакалы театры булдырылу тарихы аерым юллар булып яңгырады. Хәзер аның художество җитәкчесе Илгизәр Хөсәенов. Бүгенге актерларга алмашка яшь буын үсеп килә. Район китапханәсе карамагындагы “Алтын ачкыч” арт-студиясендә 1нче һәм 2нче мәктәпләр укучылары шөгыльләнә, алар китапханә эчендә генә түгел, бәлки район, республика һәм хәтта төбәкара чараларда да катнашалар. Бу концертта алар шулай ук уңышлы чыгыш ясадылар. 1нче мәктәпнең 3нче сыйныф укучылары Данила Павлов һәм Радмила Нәҗмиева “О славном театре замолвите слово” скетчын укыдылар.

Алга таба чараны Аделия Латыйпова башкаруында опереттадан ария, Наталья Пигина һәм Динар Юнысовлар башкаруында татар көйләренә попурри, Рөстәм Ханнановның курай-шоуы, Ольга Даринаның башкорт биюе дәвам итте. Әлбәттә, бу чыгышлар бик яхшы башкарылды һәм тамашачылар тарафыннан җылы кабул ителде.

Бакалы районы – күпмилләтле Башкортстанның бер өлеше. Бакалы барлыкка килүнең 300 еллык данлы датасы якынлаша. Никифор Епейкинның “Жизнь. Годы. Судьба” китабына күзәтүне китапханәче Клариса Попова үткәрде. Якташыбызның 25 дәфтәрдән торган китап-истәлеге узган гасыр башындагы Бакалы турында сөйли. Хәтерләүләр күп кешеләр өчен, еракта калган заман вакыйгалары, кешеләр язмышлары, көнкүреше күпләргә кадерле һәм кызыклы.

Чараны мәктәп укучылары өчен викторина дәвам итте. Китапханәче Светлана Гыйлемҗанова яшьләргә хас креатив белән аны бер тын алуда үткәрде. Иң активлар призлар алдылар.

“Яшь бакалылы” биюе ансамбле (художество җитәкчесе Р.Гайнанов һәм С.Сәетова) башкаруындагы “Гөлнәзирә” башкорт биюе беренче фестиваль концертының финалы булды. Алдагы барлык чыгышлар тулы аншлагта үтәчәгенә, Бакалы тамашачылары күп уңай эмоцияләр алачагына өмет итәбез.

Лариса СЕЛИВАНОВА.