Икмәк - көшеле, кәбестә тавы белән

Республика көнендә Бакалыда көзге авыл хуҗалыгы ярминкәсе гөрләде. Бакалыларга бу көнне күптөрле товарлар: яшелчә һәм балдан алып киң ассортиментта утырту материалына кадәр тәкъдим иттеләр.

Иртәдән үк традицион ярминкә үткәрү урынында җанлылык сизелде. Сатып алучылар килде, музыка уйнады, импровизацияле сәхнәдән тирә-юньгә күңелле җырлар яңгырады. Бәйрәм атмосферасын шашлык исе дә тулыландырды. Базарга керү юлында «Җәмәгать туклануы», «Икмәк комбинаты»ның кыр кухнялары эшләде. Кешеләр яңа гына ут өстеннән алынган, тәмле итеп кыздырылган шашлык, чебуреклар белән рәхәтләнеп сыйландылар.