Ленинградны фашистлардан азат иткән

27 гыйнварда Ленинградны фашист блокадасыннан тулысынча азат итүгә 76 ел булды. Әмма саклаучыларның һәм шәһәр халкының батырлыгы беркайчан онытылмас - камалышның кырыс көннәрендә ул нык торды, туган шәһәрен дошманга бирмәде. Шәһәрне батырларча яклаучылар арасында бакалылар да була, әмма, кызганычка каршы, курку белмәс солдатларның сафы елдан-ел сирәгәя. Һәм бүген районда Ленинградны саклаган бер генә ветеран калды, ул - Бөек Ватан сугышында катнашкан Бикҗан Асылкаевич Аптикаев. Гыйнвар башында ул үзенең 95 яшен билгеләде.

Бикҗан Аптикаев 1925 елда районның матур почмакларының берсендә, төпкелдәге Балчыклы авылында туа. Аңа сугышның авыр сынаулары, сугыштан соң халык хуҗалыгын тергезү, район халкы өчен фидакарь хезмәт белән сугарылган язмыш насыйп була.

Балачактан авыл егетендә җитезлек, үҗәтлек сизелә. Җиде ел укыганнан соң Чапаев исемендәге туган колхозында хисапчы ярдәмчесе булып эшли башлый, ә тиздән егет хисап хезмәтен үзе җитәкли. Шатланып яшисе, укыйсы, гаилә корасы, балалар үстерәсе дә бит, әмма егетнең матур планнарын кинәт башланган сугыш өзә. 1943 елның язында 18 яшьлек егет Совет Армиясе сафларына үз теләге белән китә. Тизләтелгән темпта аңа Орск шәһәрендә радист-кодировщик курслары узарга туры килә. Ленинград фронтында сугыша, Невадагы шәһәрнең блокадасын өзүдә һәм Ленинград өлкәсен азат итүдә катнаша. Беренче Белоруссия фронты составында Польшаны, Латвияне азат итә. Бөек Җиңүне чик буенда, Германиядән 40 км ераклыкта каршы ала.

Сугыштан соң Б.А.Аптикаев кече авиабелгечләр әзерләү мәктәбенә җибәрелә, Совет Армиясенең хәрби-һава көчләренең хәрби-сәяси училищесын тәмамлый.

Район, бөтен ил кебек үк, тәҗрибәле квалификацияле эшче кадрларга мохтаҗ була. Шуңа күрә туган якларына кайту белән Бикҗан Асылкаевичны партия райкомына чакыралар һәм янгын сагын җитәкләргә тәкъдим итәләр, шушы хезмәтне ул 33 ел дәвамында җитәкләде. Бу еллар эчендә структурада үзгәрешләр була: аталышы алмашына, яңалыклар кертелә. Бары тик өстенлекле бурычлар гына элеккечә кала: җәмәгать һәм шәхси секторларда янгын хәвефсезлеген тәэмин итү, халык арасында, учреждениеләрдә, предприятиеләрдә һәм оешмаларда янгынга каршы профилактикалау эше алып бару. Аптикаев җитәкләгән янгын часте республикада иң яхшысы дип санала, Бакалы янгын сүндерүчеләре коллективы алдынгы урыннарда тора. Ул үзе дә үрнәкле, гадел, таләпчән була, һәм беренче чиратта үзенә карата. Хезмәт вазыйфаларын төгәл башкарган өчен ведомство Мактау грамоталары һәм төрле дәрәҗәдә Дипломнар белән билгеләнә, акчалата премияләр белән бүләкләнә.

Бикҗан Асылкаевич менә инде өч дистә елдан артык лаеклы ялда. Ул һәм тормыш иптәше, 70 елга якын бергә гомер иткән Гөлҗамал Миңлегәрәевна биш кызы, оныклары, туруннарының игътибары һәм хәстәрлеге эчендә яшиләр. Балалар ата-ана йортына еш кунакка кайталар, бигрәк тә хәзер, әти-әниләренең яше үзен сиздерткәндә, сәламәтлекләре сынатканда. Әмма, моңа карамастан, 95 яшендә дә ветеран көр күңелле, көчле рухлы, сәяси яңалыклардан хәбәрдар, Җиңүнең чираттагы зур юбилеен каршыларга әзерләнә.

9 Майда ул традиция буенча бәйрәм пиджагын кия, аны данлы сугышчан һәм хезмәт юлы турында сөйләгән күпсанлы наградалар бизи. Алар арасында II дәрәҗә Ватан сугышы ордены, «Берлинны алган өчен», «Сугышчан хезмәтләр өчен», «Германияне җиңгән өчен» һәм башка медальләре бар. «Ленинградны обороналаган өчен» медале аңа аеруча кадерле, чөнки аның фронт юлы нәкъ менә шушы шәһәрдән башланган.

Бикҗан Асылкаевичка һәм барлык сугыш ветераннарына, тыл эшчәннәренә сәламәтлек, озын гомер һәм Җиңүнең 75 еллыгын сәламәт булып, балалары һәм туганнары белән каршылауларын телибез.