Яз, бәйрәм, волейбол

8 Март - Халыкара хатын-кызлар көне алдыннан «Олимп» физкультура-сәламәтләндерү комплексында хатын-кызлар командалары арасында волейбол буенча турнир узды.

Традиция буенча чараны яшьләр сәясәте һәм спорт комитеты һәм рәис Ф.С. Бүләкова җитәкчелегендәге район хатын-кызлар советы оештырды. Фәймә Салиховна озак еллар дәвамында уеннарның инициаторы һәм төп партнеры булып тора. Сәламләү сүзендә ул һәм спорт комитеты рәисе Ф.Ф.Гайсин гүзәл затларны язның беренче бәйрәме белән котладылар, сөйкемле хатын-кызларга шундый ук матур һәм актив булып калуларын, спортта беренче булуларын теләделәр. Чыгыш ясаучылар шулай ук хатын-кызларның үз балалары, дуслары, туганнары өчен үрнәк булуын билгеләп үттеләр, аларга иминлек, бәхет һәм сәламәтлек теләделәр.

Уеннар алдыннан залда зур җанлылык сизелде, чөнки безнең районда волейбол - иң яраткан спорт төрләренең берсе. Ярышырга, аралашырга, күңел күтәренкелеге алырга Бакалы, Иске Корыч авыл Советлары, коррекцион мәктәп, район үзәк дәваханәсе һәм бу ярышларның алыштыргысыз катнашучысы - сәламәтлек төркеме җыелды.

Берәүнең дә беренче урынны бирергә теләмәве беренче минутлардан ук билгеле булды, командалар яхшы әзерләнгән иде. Шулай да киеренке көрәштә җиңүче ачыкланды, бу – сәламәтлек төркеме. Команда инде күп еллар волейбол бәйгеләрендә даими катнаша, аның составы үзгәреп торса да, катнашучыларның спортның бу төренә, сәламәт яшәү рәвешенә мәхәббәте сакланып кала.

- Сәламәтлек төркеменә нигез салучы, сәламәтлек саклау ветераны Х.М.Ахунованы да күрү бик куанычлы булды, ул берничә дистә ел элек хезмәт вазыйфасы буенча, аннан йөрәк кушуы буенча сәламәт яшәү рәвешен пропагандалый һәм «Сәламәт тәндә – сәламәт рух» принцибы буенча яши, - дип билгели яшьләр сәясәте һәм спорт комитетының баш белгече Елена Тангаева. - Традицияләрне үзгәртмичә, төркем әгъзалары бу юлы да аны капитан итеп сайлаганнар.
Катнашучыларның барысына зур рәхмәт белдерәсем килә, ныклы сәламәтлек, әлеге мавыктыргыч уеннан аерылмавыгызны телим. Чөнки ул күп уңай эмоцияләр тудыра, яхшы формада калырга ярдәмләшә, күңел күтәренкелеге бирә.