Күңелле стартлар

Уенны физкультура укытучысы Р.Р.Гыйлемҗанов һәм директорның тәрбия эшләре буенча урынбасары Г.Р.Ямилева оештырдылар. Гаилә уеннарында күп балалы дүрт гаилә: Сәмигуллиннар, Ямилевлар, Ханнановлар, Хәлимовлар катнашты.
Командалар обруч аша сикерүдә, туп белән уенда, йөгерүдә көч сынашты. Ата-аналар һәм балалар үзләренең бердәмлеген, осталыгын һәм татулыгын күрсәттеләр. Болар бар да тарафдарларның актив ярдәме белән музыкаль бәйрәм атмосферасында булды. Мәктәпне тәмамлаучы, хәзер студент Арина Муллагалина барысына музыкаль бүләк әзерләгән иде.
Әти-әниләр Р.М.Харисов, З.Р.Заманова, Р.Р. Шәйдуллинадан торган компетентлы жюри уен барышын күзәтте һәм иң яхшы спорт командасын ачыклады. Киеренке ярышта Ямилевлар гаиләсе җиңү яулады.
Команда ярышларыннан соң волейбол матчы узды. Уен бик кызыклы һәм актив булды.